Myen Asuya Ningtau Dap Awn Daju Soe Win Kawn KSDP Pati Salang Ni Hte Hkrum Shaga

Ningtau Dap Awn Daju Soe Win kaw nna Kachin State Democracy Party (KSDP) kaw na Dr. Manam Tu Ja, Slg. Hpauyu Brang Li hte Slg. Hkyet Hkun Sar ni hte October 13, 7:00am aten ေျမာက္ပိုင္းတုိင္းစစ္ဌာနခ်ဳပ္၊ မလိခ ဧည့္ရိပ္သာ kaw hkrum shaga ai lam na chye lu ai.

Dai hpawng hta Ningtau Dap Awn Daju Soe Win kaw nna tsun ai gaw Myen Mungdan ting gap hkap jahkring laika (NCA) sen htu lu hkra yawng karum madi shadaw ra ai lam hte Myen asuya hpyen dap (Tatmadaw) kaw nna mung simsa lam bawngban ai lam hpe n’gun dating let shakut nga ai lam tsun ai.

Bai nna, Dr. Manam Tu Ja (KSDP) kaw nna tang madun lai wa ai gaw Myen Mungdan a Mung masa gram sharai ai lam hta awng dang wa lu hkra yawng karum madi shadaw ai hte gram sharai sa wa ra ai lam tsun ai.

Matut nna, Mungdan ting gap hkat jahkring laika (NCA) sen htu sa wa na lam hte seng nna gaw Myen Mung Munghpawm amyu sha yawng shanglawm lu na ahkaw ahkang, hkrang shapraw sa wa lu na lam, simsa lam bawngban ai shaloi awngdang lu na lam hte 2015 Ra Lata poi hpe awngdang ai hte galaw lu na matu asuya hpyen dap kaw nna gasat gala ai lam jahkring da ra na lam grai ahkyak ai, nga nna tang madun tsun shana lai wa sai lam (Ksdp Kachin (Facebook) laika man) kaw ka tawn ai.

October 12 ya shani gaw Nawng Nang Chyum Dakkasu de Ningtau Dap Awn Daju Soe Win, M.P.Hk Taimu Win Bo Shing hte hpung ni kaw nna Jawng Up hte sharin Sara marai (15) hte sa du hkrum shaga lai wa sai re.