Hugawng ginwang maga gasat gala bai byin

Hugawng ginwang, Nam Hkam mare mayan KIA Dap Dung (14) hpung ni ginra jasan hkawm ai kaw Myen hpyen hpung langai hte ang katut nna July 12 ya 2:30 pm – 3:15 pm laman gasat poi byin ai lam na chye lu ai.

Hpakant ginwang, Lai Nawng Hku, Mazup Yang Training Pa maga mayun shamu shamawt lung wa ai Myen hpyen hpung langai July 11 ya 1:15 am daram hta hkam bawm (1) kabye kapaw la nna sinat kaji (10) lang jan hte 60mm ngu maram lu ai sinat kaba (2) lang gap bun ai lam shawng lam shiga na lu ai.

KIO Ginjaw ginra, Bum Re kaw nga ai Myen hpyen hpung ni kawn KIA Dap Dung (23) hpung ni nga ai hpyen man maga de July 10 ya 5 pm daram hta Point- 5 hte numdaw (3) lang gap bun ai lam chye lu ai.

Munggu ginwang, Kawng Sahti kaw nga ai Hk.M.Y (216) dap na Myen hpyenla n-gun (40) daram gaw July 10 ya 6 pm daram hta KIA Dap Dung (36) ni nga ai U Raw Bum kaw gale pru wa ai majaw KIA ni kawn 60mm (1) lang gap bun ai lam chye lu ai.

Dap Ba (2) ginra, Sut Manau lam Je Htang Mahkrai makau kaw Nawng Nyang mare maga kawn lung wa ai Myen hpyenla n-gun (70) daram hte KIA hpyen hpung ni July 8 ya 12:05 pm -12:30 pm laman ang katut gasat poi byin ai. Matut nna, 7 pm daram du hkra Myen hpyen hpung ni sinat kaji kaba gap sharu bun ai lam chye lu ai.

Leave a Reply

*

This site uses Akismet to reduce spam. Learn how your comment data is processed.